2023 թվականի նոյեմբերի 13-ին Եվրասիա միջազգային համալսարանի հրավերով Երևանի հենակետային բժշկական քոլեջի «Դեղագործություն» և «Բուժական կոսմետոլոգիա» բաժինների մի խումբ ուսանողներ «Դեղագործական մոդուլների և դեղաբանություն» ամբիոնի վարիչ Մ․ Շահնազարյանի ուղեկցությամբ և Եվրասիա միջազգային համալսարանի «Ֆարմացիա» ֆակուլտետի դասախոսների, ֆակուլտետի IV կուրսի հայ և օտարազգի ուսանողների հետ այցելեցին «ՆԱԻՐԻԱՆ» բնական կոսմետիկայի արտադրության գործարան, որը տեղակայված է Արա լեռան ստորոտում գտնվող Արագյուղում։ Այցելության ընթացքում նրանք ծանոթացան բազմաթիվ դեղաբույսերի հետ, ուսումնասիրեցին դրանք և կատարեցին մի շարք հետազոտական աշխատանքներ։
«ՆԱԻՐԻԱՆ»-ի գիտաշխատողները ուսանողներին ծանոթացրին բնական մեթոդներով աճեցվող բաղադրիչների՝ դեղաբույսերի աճման պայմաններին։
Ուսանողներն ուսումնասիրեցին «ՆԱԻՐԻԱՆ»-ի՝ ջրովի պայմաններում աճող դեղաբույսերից ստացվող եթերայուղերի բաղադրությունը և համեմատեցին բնության մեջ անջուր պայմաններում աճող նույն դեղաբույսերից ստացվող եթերայուղերի հետ՝ համոզվելով դրանց համարժեքության մեջ։
Ուսանողները ծանոթացան քսուքների, լոսյոնների և մազաթափության դեմ շամպունների բաղադրության մեջ օգտագործվող մեծ քանակությամբ դեղաբույսերի (հազրեվարդ դեղատու, նարդոս, նեղտերև, վաղենակ դեղատու, ուրց գետնատարած, ուրցադաղձ, տուղտ դեղատու, գայլուկ և այլն) աճման պայմաններին և ուսումնասիրեցին դրանց դեղաբանական ազդեցությունները։
Նրանք ավելի մանրամասն ուսումնասիրեցին ուրց գետնատարած դեղաբույսից ստացված եթերայուղի բաղադրությունը՝ կատարելով եթերայուղի որակական և քանակական անալիզ և համեմատելով այն պետական ֆարմակոպեայի և նորմատիվ տեխնիկական փաստաթղթերով պահանջված ստանդարտների հետ։ Հետազոտության արդյունքում պարզեցին, որ մշակված (կուլտիվացվող) և վայրի աճող ուրցի որակական և քանակական անալիզի տվյալներն էապես չեն տարբերվում։
Մասնագետներն ուսանողներին ուղեկցեցին նաև օճառի ստացման արտադրամաս և ցուցադրեցին օճառների բազմազան տեսակները՝ բացատրելով դրանց դեղաբանական բուժիչ ազդեցությունները։ Ուսումնասիրության արդյունքում ուսանողները պարզեցին, որ բուսական հավելումներով օճառները թողնում են ոչ միայն բուժական ազդեցություն մի շարք մաշկային հիվանդությունների (փսորեազ, ակնե և այլն) ժամանակ, այլև շատ կարևոր է այն փաստը, որ բնական օճառները, որոնք իրենց մեջ չեն պարունակում սինթետիկ, բուրավետ նյութեր և հավելումներ, առավելապես պահպանում են մաշկի թթվահիմնային բալանսը՝ PH-ը, որը նպաստում է մաշկի բնական վերաճմանը։ Ուսանողներն ուսումնասիրեցին նաև գայլուկի մզվածքով շամպունների բաղադրությունը։
Այնուհետև, այցելելով վարդի եթերայուղի ստացման արտադրամաս, ուսանողները ծանոթացան և ուսումնասիրեցին վարդի աճեցման պայմաններին՝ հավաքելուց մինչև եթերայուղի ստացման գործընթացներ։
Նրանք մեծ ոգևորությամբ էին շրջում արտադրամասերում՝ ստանալով նորանոր գիտելիքներ «ՆԱԻՐԻԱՆ»-ի բուժիչ դեղաբույսերի և նրանցից պատրաստվող կոսմետիկ միջոցների մասին։
Շնորհակալություն ենք հայտնում Եվրասիա միջազգային համալսարանին նման հաճելի հրավերի համար։
