Շրջայց «ՖարմաՏեք» դեղարտադրող ընկերությունում

2024 թվականի մայիսի 3-ին և հունիսի 13-ին «ՖարմաՏեք» դեղարտադրող գործարան էին այցելել Երևանի հենակետային բժշկական քոլեջի «Դեղագործություն» բաժնի II և III կուրսերի ակտիվ ուսանողները «Դեղագործական մոդուլների և դեղաբանության ամբիոն»-ի վարիչ Մ․Շահնազարյանի և «Դեղաբանության կազմակերպում և էկոնոմիկա», «Դեղագործության մարքեթինգի և մենեջմենթի» մոդուլները դասավանդող դասախոս Ա․Բեզոյանի ուղեկցությամբ։

Առաջին այցի ժամանակ «ՖարմաՏեք» ընկերության Որակի վերահսկման տնօրեն Գ․ Սարգսյանի հետ կլոր սեղանի շուրջ իրականացվեցին քննարկումներ, որոնց ընթացքում ուսանողները ծանոթացան գործարանի արտադրանքին։ Այնուհետև քննարկվեց 0.9% ֆիզիոլոգիական լուծույթի արտադրությունը՝ հումքից մինչև փաթեթավորում և իրացում։ Ի դեպ, գործարանը հիմնադրվել է 1998 թվականին և աշխատում է GMP ստանդարտներով:

Երկրորդ այցի ժամանակ ուսանողները և դասախոսները Որակի վերահսկման տնօրեն Գ․Սարգսյանի ուղեկցությամբ համապատասխան արտահագուստով շրջեցին արտադրամասերով և ծանոթացան այն բոլոր պրոցեսներին, որոնք իրականացվում են ներարկման լուծույթը պատրաստելիս։

Այցերը չափազանց հետաքրքիր էին և ուսուցողական։ Ուսանողներն իրենց գործնական կարողությունները և տեսական գիտելիքները մեկտեղելով՝ էլ ավելի կարևորեցին իրենց մասնագիտությունը և նրանցից ոմանք որոշեցին ուսումն ավարտելուց հետո աշխատել նման արտադրամասերում։ Գործարանի տնօրինությունը ողջունեց ուսանողների այս որոշումը։

Ուսանողները տպավորված էին՝ ականատես լինելով դեղերի փուլ առ փուլ արտադրությանը։

Շնորհակալություն «ՖարմաՏեք» դեղարտադրող ընկերությանը՝ մեր ուսանողներին նման հնարավորություն ընձեռելու համար։