2026թ․ ապրիլի 9-ին, ֆրանկոֆոնիայի օրերի շրջանակում, Երևանի հենակետային պետական բժշկական քոլեջի «Հանրակրթական ծրագրով» բաժնի 120 խմբի ուսանողների մասնակցությամբ կայացավ «Փարիզ․ ոճ, արվեստ և սեր» խորագրով դաս-միջոցառում, որը կազմակերպել էր «Հասարակագիտություն» առարկայի դասախոս Անի Ավետիսյանը։
Ֆրանկոֆոնիայի օրերը, որոնք նշվում են աշխարհի տարբեր երկրներում, միավորում են ֆրանսերենը որպես հաղորդակցման լեզու օգտագործող երկրներին ու ժողովուրդներին՝ խթանելով մշակութային բազմազանությունը, միջազգային համագործակցությունը և լեզվական արժեքների պահպանումը։ ԵՎ ահա այս գաղափարի շրջանակում կազմակերպված դաս-միջոցառման նպատակն էր ուսանողների մոտ ձևավորել հետաքրքրություն ֆրանսիական մշակույթի, արվեստի և լեզվի նկատմամբ, ինչպես նաև ներկայացնել Փարիզը՝ որպես համաշխարհային նորաձևության, արվեստի և սիրո խորհրդանիշ։
Միջոցառման ընթացքում ուսանողները ներկայացրեցին Փարիզի պատմությունը, տեսարժան վայրերը, ֆրանսիական նորաձևության առանձնահատկությունները և մշակութային արժեքները։ Հնչեցրին ֆրանսիական երգեր, ներկայացրեցին գեղեցիկ պարային կատարումներ։
Ուսանողները հանդես եկան նաև տեսասահիկով, որն արտացոլում էր ֆրանսիական կյանքի ոճը, արվեստն ու սիրո թեման։
Դաս-միջոցառումն անցավ ջերմ ու ոգեշնչող մթնոլորտում՝ նպաստելով ուսանողների աշխարհայացքի ընդլայնմանը, ֆրանսիական մշակույթի հանդեպ հետաքրքրության խորացմանը և ստեղծագործական ունակությունների զարգացմանը։
Ապրիլի 9, 2026թ.