2025 թվականի մարտի 11-ին ԵՀՊԲ քոլեջի «Մանկաբարձական գործ» բաժնի 201 խմբում կազմակերպվեց «Ֆրանկոֆոնիան և հայերը» խորագրով դաս-միջոցառում։ Այն անցկացվեց «Իրավունքի հիմունքներ» առարկայի շրջանակում՝ դասախոս Ա. Խաչատրյանի նախաձեռնությամբ։
Միջոցառման նպատակն էր ներկայացնել Ֆրանկոֆոնիայի մշակութային բազմազանությունը և արժևորել այն պատմական ու մշակութային կապերը, որոնք գոյություն ունեն հայ ժողովրդի և ֆրանսախոս աշխարհի միջև։ Ֆրանկոֆոնիան ոչ միայն լեզվական տարածք է, այլև գաղափար՝ կամուրջ ժողովուրդների միջև, հիմնված ազատության, հումանիզմի և մշակութային երկխոսության արժեքների վրա։
Ուսանողները նշեցին, որ հայ ժողովուրդը դարեր շարունակ եղել է այդ արժեքները կրող և տարածող ժողովուրդներից։ Դրա վառ ապացույցներն են ինչպես Մեսրոպ Մաշտոցի աշակերտների գործունեությունը՝ արևմտյան աշխարհին հայկական քաղաքակրթությունը ներկայացնելու գործում, այնպես էլ ֆրանսահայ մտավորականների, արվեստագետների և գրողների ներդրումը ֆրանկոֆոն մշակույթում։
Միջոցառման ընթացքում ուսանողները վերաիմաստավորեցին հայ-ֆրանկոֆոն հարաբերությունները, անդրադարձան հայ ժողովրդի պատմական արմատներին, մշակութային ներկայությանը և ապագա համագործակցության հնարավորություններին։
Միջոցառումն ուղեկցվեց թեմային համահունչ տեսասահիկներով և ջերմ, ստեղծագործ մթնոլորտով։
