2025թ. մարտի 7-ին Հայաստանի ազգային գրադարանի Թամանյանական հանդիսությունների դահլիճում անցկացվեց «Բյուր աստղ» խորագրով շնորհալի դպրոցականների նախատոնական համերգ-ցուցահանդեսը, որը կազմակերպել էր «Մաեստրո» մշակութային հասարակական կազմակերպության նախագահ, Վ. Սպիվակովի բարեգործական հիմնադրամի հայաստանյան ներկայացուցիչ Վարդուհի Գևորգյանը: Միջոցառմանը ներկա էին նաև Երևանի հենակետային պետական բժշկական քոլեջի մի խումբ ուսանողներ՝ քոլեջի ավագ գրադարանավար Լ․Փափազյանի ղեկավարությամբ։
Համերգի մասնակիցները Հայաստանի տարբեր մարզերից էին, առավելապես՝ պատվավոր մրցույթներում հաղթած պատանի երաժիշտներ, ովքեր նվագում էին ոչ միայն ազգային նվագարաններ` քանոն, սանթուր, քյամանչա, բլուլ, դափ, դհոլ, այլ նաև դասական գործիքներ՝ դաշնամուր, թավջութակ։
Հատկապես տպավորիչ էր Թեոդորո Կոտրաուի «Նեապոլիտանական երգը» Արամե Հունանյանի կատարմամբ։ Մեծ հետաքրքրություն առաջացրեց նաև պատանի նկարիչների և կիրառական արվեստի ստեղծագործողների աշխատանքների ցուցադրությունը։
Իրականացված նախագիծը հետաքրքիր էր, լավ կազմակերպված և լի հաճելի նախատոնական հույզերով։
