2026թ․ ապրիլի 27-ին Երևանի հենակետային պետական բժշկական քոլեջի դասախոսներն ու մի խումբ ուսանողներ համագործակցության շրջանակների ընդլայնման նպատակով ճանաչողական այց կատարեցին Ավանդական բժշկության համալսարան։
Շրջայցի ընթացքում ներկայացվեց համալսարանի ուսումնագիտական միջավայրը, ժամանակակից կրթական մոտեցումները և այն լայն հնարավորությունները, որոնք նպաստում են ապագա մասնագետների համակողմանի ու մրցունակ զարգացմանը։ Մասնակիցները ծանոթացան կրթական գործընթացի կազմակերպման սկզբունքներին, նորարարական մեթոդներին և ուսումնառության որակի բարձրացմանն ուղղված նախաձեռնություններին։
Համալսարանի լսարաններն ու լաբորատորիաները հագեցած են արդի սարքավորումներով՝ ապահովելով ուսումնական գործընթացի արդյունավետ կազմակերպում և գիտագործնական հմտությունների զարգացում։ Առանձնահատուկ ուշադրության արժանացան ատամնաբուժարանը, ինչպես նաև վիրաբուժական և թերապևտիկ բաժանմունքները։
Տպավորիչ էին նաև «ՕՍԿԵ» և «ՕՍՊԵ» գնահատման սեկտորները, որոնք հնարավորություն են տալիս իրականացնել ուսանողների գիտելիքների և կարողությունների օբյեկտիվ, թափանցիկ և չափորոշիչներին համապատասխան գնահատում։
Շրջայցի կարևոր բաղադրիչներից էր «պիրոգովյան սեղանը», որը նպաստում է ուսանողների տարածական և անատոմիական մտածողության զարգացմանը՝ ապահովելով բարձրակարգ մասնագիտական պատրաստվածություն։
Այցը ևս մեկ անգամ վկայեց, որ համալսարանը ստեղծում է բարձրորակ կրթության իրականացման համար անհրաժեշտ բոլոր պայմանները՝ համադրելով ավանդական արժեքներն ու նորագույն կրթական տեխնոլոգիաները։
Այցն արդյունավետ էր և տպավորիչ քոլեջի ուսանողների համար։
Ապրիլի 27, 2026թ.
