Դաս-էքսկուրսիա Գյումրիում

2025 թվականի ապրիլի 19-ին ԵՀՊԲ քոլեջի «Հանրակրթական ծրագրով» բաժնի 108 խմբի ուսանողները, դասախոսներ Ս. Սարգսյանի, Ն. Հարությունյանի և Մ. Գևորգյանի ուղեկցությամբ, կազմակերպեցին ճանաչողական էքսկուրսիա դեպի Շիրակի մարզ։ Մասնակցում էին նաև մի շարք դասախոսներ և ուսանողների ծնողներ։

Էքսկուրսիան սկսվեց պատմական և ճարտարապետական բացառիկ արժեք ներկայացնող Երերույքի տաճարից, որը հիմնադրվել է 4–5-րդ դարերում։ Տաճարը տպավորեց իր յուրահատուկ կառուցվածքով, մշակութային շերտերով, հայկական տառերով կատարված գաղտնագրերով, պատկերազարդ խորաններով և զոհասեղանով։ Տաճարի դիմաց բարձրացված էր Հայաստանի Հանրապետության դրոշը, իսկ տաճարի հարևանությամբ կանգնած մեծ խաչը պահպանում էր հայ-թուրքական սահմանը։ Ուսանողների աչքից չվրիպեց նաև հեռվում նշմարվող Անի քաղաքի ավերակների տեսարանը։

Այնուհետև այցելեցին Հովհաննես Շիրազի և Ավետիք Իսահակյանի տուն-թանգարաններ՝ զգալով հայ գրականության հսկաների շունչն ու ստեղծագործական ուժը։ Գյումրին իրենց գրավեց իր անկրկնելի կոլորիտով, մշակութային հարուստ ժառանգությամբ և հոգևոր շնչով լի եկեղեցիներով։

Էքսկուրսիան ոչ միայն կրթական, այլև հույզերով լի, հայրենասիրական և մշակութային առումով տպավորիչ ու հիշարժան փորձառություն դարձավ ուսանողների համար։