2025 թվականի ապրիլի 2-ին Երևանի հենակետային պետական բժշկական քոլեջի «Հանրակրթական ծրագրով» բաժնի 119 խմբում «Հայոց լեզու և գրականություն» առարկայի դասախոս Ա.Եղոյանի ղեկավարությամբ տեղի ունեցավ «Ալեքսանդր Շիրվանզադեի «Քաոս» վեպը» խորագրով դաս-միջոցառում։
Միջոցառմանը ներկա էին նաև քոլեջի ուսումնական գծով փոխտնօրեն Մ.Սարգսյանը, մասնագիտական կողմնորոշման և կարիերայի ուղղորդման պատասխանատու Լ.Մանուչարյանը, մեթոդիստ Կ.Մնացականյանը, «Հանրակրթական առարկաների, լեզուների և հասարակագիտական առարկաների ամբիոն»-ի վարիչ Ս.Տորտիկյանը և ամբիոնի դասախոսները։
Միջոցառման նպատակն էր ուսանողներին ծանոթացնել Ալեքսանդր Շիրվանզադեի «Քաոս» վեպի բովանդակությունը, վերլուծել վեպում ներկայացված սոցիալական խնդիրները, անհատական և հասարակական արժեքների բախումը, ինչպես նաև զարգացնել ուսանողների գրականագիտական մտածողությունը և վերլուծական հմտությունները։
Ուսանողներն արդրադարձան հերոսների անհատական պայքարին և վեպում գերակշռող հոգեբանական քաոսին։ Նրանք ընդգծեցին հերոսների ներաշխարհի խորը հոգեբանական ապրումները՝ երկվություն, վախ, պարտավորվածություն հասարակության հանդեպ, սիրո և շահի հակասություն, ինքնության ճգնաժամ։ Բացահայտեցին, որ վեպի վերնագիրն ունի խորհրդանշական իմաստ և այն վերաբերում է ոչ միայն հասարակական քաոսին, այլ նաև հերոսների ներաշխարհին. քաոսը որպես մետաֆոր՝ փոփոխվող արժեքների ու անկայուն հասարակության։
Միջոցառումն ուղեկցվում էր տեսասահիկներով, որտեղ կերպարները ներկայացվում էին նորարար մեթոդով՝ արհեստական բանականության (ԱԲ) միջոցով, որպեսզի ուսանողներն ավելի խորությամբ և ժամանակակից մոտեցմամբ ճանաչեն վեպի հերոսներին։
Այս միջոցառումը ոչ միայն գրականության մասին էր, այլ նաև այն մասին, թե որքան բան կարելի է սովորել գրական հերոսներից՝ հասկանալու կյանքը, արժեքներն ու ժամանակի «քաոսը»։
Սերնդե-սերունդ փոխանցվող «Քաոս» վեպը կօգնի ձևավորելու հասարակություն, որտեղ ավելի շատ է մարդասիրությունը, համերաշխությունը և գիտակցված ընտրությունները՝ նույնիսկ ամենախրթին իրականության մեջ։
Դաս–միջոցառումը լի էր հույզերով, անմիջական և հետաքրքիր քննարկումներով։
