2025 թվականի մարտի 25-ին Երևանի հենակետային պետական բժշկական քոլեջի «Մանկաբարձական գործ» բաժնի 402 խմբի ուսանողները «Ընդհանուր բժշկական մոդուլների, մանրէաբանության, հիգիենայի և էկոլոգիայի, վարակիչ, մաշկային, սեռավարակ հիվանդությունների ամբիոն»-ի դասախոս Տաթևիկ Դավոյանի ղեկավարությամբ մասնակցեցին «Պաշտպանված սրտի քաղաք» նախաձեռնությանը։ Այն անցկացվեց “Faster First Aid” ընկերության հիմնադիր և տնօրեն Գուրգեն Հովհաննիսյանի կողմից անցկացվող միջազգային վերջին ստանդարտներին համապատասխան «Առաջին օգնություն» դասընթացին:
Նախաձեռնությունը իրականացվում է «Հենար» և «Ֆիլիպս» հիմնադրամների, ինչպես նաև Երևանի քաղաքապետարանի հետ ռազմավարական համագործակցությամբ, որին միացել են նաև ՀՀ Առողջապահության նախարարությունը, ՀՀ ներքին գործերի նախարարությունը, Հայաստանի սրտաբանների ասոցիացիան և Շտապ օգնության ծառայությունը:
Դասընթացում ընդգրկված էին՝
- ✧ Տեսական և գործնական պարապմունքներ
- ✧ Իրական դեպքերի նմանակումներ
- ✧ Վարժանքներ
- ✧ Առաջին օգնության սպասարկման ծառայություններ
Այս ծրագրի շրջանակում ավելի քան 300 մասնակից արդեն վերապատրաստվել է և պատրաստ է փրկելու կյանքեր և դարձնել Երևանը ավելի ապահով քաղաք:
Կամավորները վերապատրաստվում են սիրտ-թոքային վերակենդանացման (CPR) և դեֆիբրիլյատորների ճիշտ կիրառման հմտություններին: Հաշվի առնելով յուրաքանչյուր վայրկյանի վճռորոշ լինելը՝ վերապատրաստված կամավորները գիտեն, թե ինչպես ճիշտ և արագ գործել սրտի հանկարծակի կանգի դեպքերում:
Սրտի կանգի դեպքեր կարող են պատահել ոչ միայն դրսում՝ անծանոթների հետ, այլ նաև տանը, աշխատանքի վայրում և ամենուր: Իսկ գոնե մեկ անգամ առաջին օգնության դասընթաց անցած մասնակիցն ի վիճակի է հաղթահարել վախերն ու խոչընդոտները՝ ճիշտ օգնություն ցուցաբերելու համար:
Դասընթացի ավարտին մասնակիցներին տրամադրվեց միջազգային վկայականներ։
Շնորհակալություն ենք հայտնում “Faster First Aid” ընկերությանը նման կարևոր և արդյունավետ դասընթացի կազմակերպման համար։
Սկզբնաղբյուր՝ “Faster First Aid”-ի ֆեյսբուքյան պաշտոնական էջ։
