2024 թվականի նոյեմբերի 10-ին Երևանի հենակետային բժշկական քոլեջի «Հանրակրթական ծրագրով բաժնի» 123, 118 խմբերի ուսանողները «Հանրակրթական, լեզուների և հասարակագիտական առարկաների ամբիոն»-ի «Հայոց լեզու և հայ գրականություն» առարկայի դասախոսներ Լ.Վարդումյանի և Ս.Սարգսյանի ղեկավարությամբ Կինոյի տանը դիտեցին «Մհերի դռան առեղծվածը» ֆիլմը։ Ֆիլմի ցուցադրման օրը համընկել էր «Հայ գրականության» առարկայի ծրագրում «Սասունցի Դավիթ» էպոսի դասաժամերին:
Դահլիճը լեփ-լեցուն էր հանդիսատեսով: Սկզբում ելույթ ունեցավ ֆիլմի բանախոս Արթուր Արմինը, այնուհետև սկսվեց ֆիլմի ցուցադրությունը։ Ֆիլմում կային «Մհերի դռան առեղծվածի» մասին ճշգրիտ ժամանակագրություն, տոմարագիտություն, աստղերի և մոլորակների շարժման տիեզերական գիտելիքների բացահայտումներ, անգամ խոսվում էր մաթեմատիկայի «Ոսկե կանոնի» մասին, որով չափագրվել էր Մհերի դուռը։
Ուսանողների համար հայտնություն էր, որ Մհերի դուռը փորագրվել և թվագրվել է մ․թ․ա․ 4-3 հազարամյակում և, որ գիտականորեն ապացուցվել են այն փաստերը, որ «Սասունցի Դավիթ» էպոսը թվագրում է ոչ թե 12–րդ դարը, որի մասին գրված է «Հայ գրականության» դասագրքում, այլ՝ Ուրարտական ժամանակաշրջանը, քանի որ Մհերի դռան վրա գրված արձանագրությունները դրանք են ապացուցում:
Ֆիլմը շատ հետաքրքիր էր, ոգևորիչ և տեղեկատվական։
Նոյեմբերի 11, 2024թ.
