2026թ. մայիսի 22-ին Երևանի հենակետային պետական բժշկական քոլեջի «Դեղագործություն» բաժնի 204 խմբի առաջին ենթախմբի ուսանողները քոլեջի «Դեղագործական մոդուլների և դեղաբանության ամբիոն»-ի վարիչ Մ. Շահնազարյանի ղեկավարությամբ համագործակցության շրջանակում մասնակցեցին Եվրասիա միջազգային համալսարանի «Ֆարմացիա» ֆակուլտետի քիմիայի լաբորատորիայում «Դեղագործական քիմիա» մոդուլի շրջանակում անցկացված գործնական-հետազոտական դասին։
Գործնական դասը նվիրված էր «պարացետամոլ» դեղամիջոցի դեղաբանական հատկությունների համեմատական վերլուծությանը։ Ուսանողները հետազոտության համար ընտրել էին պարացետամոլի չորս տարբեր առևտրային անվանումներ և իրականացրել դրանց նույնականացումը։
Նախապես ուսումնասիրելով թեմայի տեսական մասը՝ ուսանողները գործնական փուլում վստահորեն և հետևողականորեն իրականացրեցին աշխատանքային բոլոր քայլերը։ Լաբորատորիայում նրանք կատարեցին ինչպես որակական, այնպես էլ քանակական անալիզներ՝ կիրառելով համապատասխան սարքավորումներ և մեթոդներ։
Արդյունքների համեմատական ուսումնասիրությունը հնարավորություն տվեց կատարել անհրաժեշտ եզրակացություններ և ամրապնդել տեսական գիտելիքները գործնական փորձով։
Նմանատիպ համագործակցային և հետազոտական դասերը կարևոր դեր ունեն ուսանողների մասնագիտական հետաքրքրությունների ձևավորման, գործնական կարողությունների զարգացման և մասնագիտության նկատմամբ պատասխանատու վերաբերմունքի ամրապնդման գործում։
Շնորհակալություն ենք հայտնում մեր գործընկերներին՝ մեր ուսանողներին նման արդյունավետ և արժեքավոր կրթական միջավայր տրամադրելու համար։
Մայիսի 22, 2026թ.
