2026թ․ մարտի 25-ին Երևանի Հենակետային պետական բժշկական քոլեջի «Հանրակրթական ծրագրով» բաժնի մի խումբ ուսանողներ «Հասարակագիտություն» առարկայի դասախոսներ Ա․ Ավետիսյանի և Ս․ Հարությունյանի ուղեկցությամբ ուսումնական ծրագրի շրջանակում այցելեցին ՀՀ Կենտրոնական բանկի այցելուների կենտրոն։
Այցի ընթացքում ուսանողները ծանոթացան Հայաստանի ֆինանսական համակարգի պատմությանը, դրամավարկային քաղաքականության հիմնական սկզբունքներին և Կենտրոնական բանկի գործունեությանը։ Նրանք ուսումնասիրեցին հայկական դրամի ստեղծման պատմությունը, դիտեցին տարբեր տարիների թղթադրամներ և մետաղադրամներ, ինչպես նաև տեղեկություններ ստացան դրանց պաշտպանական առանձնահատկությունների մասին։
Կենտրոնի աշխատակիցների կողմից ներկայացվեցին նաև ֆինանսական գրագիտության կարևոր տարրերը, մասնավորապես՝ խնայողության, բյուջետավորման և պատասխանատու ֆինանսական վարքագծի սկզբունքները։
Ուսանողները ակտիվորեն մասնակցեցին քննարկումներին, ուղղեցին հարցեր և ստացան սպառիչ պատասխաններ։
Այցը ոչ միայն ուսուցողական էր, այլև նպաստեց ուսանողների գիտելիքների ընդլայնմանը և գործնական մտածողության զարգացմանը։
