2025 թ. հոկտեմբերի 16-ին Երևանի հենակետային պետական բժշկական քոլեջում կայացավ համագործակցային հանդիպում Երևանի թիվ 4 տարածքային մանկավարժահոգեբանական աջակցության կենտրոնի աշխատակիցների հետ։
Հանդիպման նպատակն էր խթանել կրթական ներառականության սկզբունքների գործնական իրականացումը, ինչպես նաև ներկայացնել քոլեջի և ՏՄԱԿ-ի միջև համագործակցության հնարավոր ուղղությունները։
Տարածքային մանկավարժահոգեբանական աջակցության կենտրոնի վերապատրաստման բաժնի համակարգող Ա. Քալաշյանը հանդես եկավ տեղեկատվական զեկուցմամբ՝ մանրամասն ներկայացնելով կենտրոնի հիմնական գործառույթները։ Նա հատուկ անդրադարձավ կրթության առանձնահատուկ պայմանների կարիք ունեցող ուսանողների կրթական միջավայրում ինտեգրման առանձնահատկություններին, ընդգծեց անհատական մոտեցման կարևորությունը, ինչպես նաև ներկայացրեց հոգեբանական աջակցության տրամադրման եղանակներն ու ընթացակարգերը։
Քննարկման ընթացքում անդրադարձ կատարվեց ուսումնական գործընթացի հարմարեցման, կրթական բարիքների հավասար հասանելիության, ուսանողների զարգացման խթանման և ներառական միջավայրի ապահովման հիմնախնդիրներին։
Հանդիպման ավարտին մասնակիցները լրացրեցին մշտադիտարկման թերթիկ, որի միջոցով ամփոփվեցին հանդիպման արդյունքները և նշվեցին հետագա գործողությունների հիմնական ուղղությունները։
Համագործակցությունը կրելու է շարունակական բնույթ։ Առաջիկայում նախատեսվում են նոր հանդիպումներ, սեմինարներ և աշխատաժողովներ՝ նպատակ ունենալով ապահովել ուսանողների կրթական, հոգեբանական և սոցիալական լիարժեք ներառումը։
