Երևանի հենակետային բժշկական քոլեջի «Դեղագործություն» բաժնի II կուրսի ուսանողները հունիսի 1-21-ը ուսումնաարտադրական պրակտիկան անց են կացրել Հիդրոպոնիկայի պրոբլեմների ինստիտուտում, որտեղ ԵՀԲ քոլեջի «Դեղագործական առարկաների և դեղաբանության» ամբիոնի վարիչ Մ.Շահնազարյանի, մեթոդ ղեկավարներ Ն.Սարիբեկյանի, Ա.Բեզոյանի, Ռ.Պետրոսյանի ուղեկցությամբ ուսանողները ինստիտուտի գիտաշխատողների հետ մասնակցել են այնպիսի գիտահետազոտական աշխատանքների, ինչպիսիք են՝
- ✧ սնուցող հեղուկների միջավայրի թթվա-հիմնայնության որոշումը,
- ✧ ջրի կոշտությունը որոշումը,
- ✧ դեղաբույսերի աճեցումը ստերիլ պայմաններում, դրանց ադապտացումը և տեղայնացումը գիտահետազոտական ինստիտուտի տարածքի պայմաններին։
Պայմանավորվածություն է ձեռք բերվել օգոստոս ամսին մասնակցել եթերային յուղերի ստացման գործընթացին, որըն իր մեջ ներառելու է նաև քրոմատոգրաֆիկ եղանակով որակական և քանակական անալիզը։
Պրակտիկայի ընթացքում ուսանողներն այցելել են նաև Երևանի բուսաբանական այգի, որը հնարավորություն է ընձեռել ծանոթանալու տարբեր կլիմայական պայմաններում աճող դեղաբույսերի, որոնց համար բուսաբանական այգում ստեղծված են հատուկ ջերմոցներ։ Ծանոթացել են նաև բուսաբանական այգում գործող թանգարանային նմուշներին, բույսերի բրածո մնացորդներին, պահոցներում պահվող դեղաբուսատեսակներին և ներկա գտնվել բույսերի հերբարիումների պատրաստման գործընթացին։
Իսկ Երևանի քիմիադեղագործական ֆիրմա այցելության ժամանակ ուսանողներն ականատես են եղել հեղուկ դեղաձևերի պատրաստմանը, փաթեթավորմանը և պահեստավորմանը։
Ուսանողները Ճանաչողական այցեր են կատարել նաև մի շարք դեղատնային ցանցեր, որտեղ ծանոթացել են բուսական և կենդանական ծագում ունեցող դեղամիջոցներին, նրանց դասակարգմանը և արդյունավետությանը։
Շնորհակալություն ենք հայտնում այն անձանց, ովքեր պրակտիկայի ընթացքում ԵՀԲ քոլեջի ուսանողներին և դասախոսներին սիրով ընդունել և հարուստ գիտելիքներ են փոխանցել։
