Բժշկության պատմության թանգարան
2023 թ. նոյեմբերի 3-ին Երևանի հենակետային բժշկական քոլեջի «Հանրակրթական ծրագրով բաժնի» 102 և 118 խմբերի ուսանողները բաժնի վարիչ Ա․Կիրակոսյանի և դասախոսներ Ռ.Հայրապետյանի և Ա․Կարապետյանի ուղեկցությամբ այցելեցին Երևանի Մ. Հերացու անվան Պետական բժշկական համալսարանում գործող Բժշկության պատմության թանգարան։ Այնտեղ նրանք հնարավորություն ունեցան ծանոթանալու հայ բժշկության պատմությանը հին ժամանակներից մինչև մեր օրերը, ինչպես նաև այդ պատմությունը վավերացնող շուրջ 500 ցուցանմուշների։ Հավաքածուում տեղ են գտել անվանի գիտնականների ձեռագրեր, փաստաթղթեր, անձնական իրեր, շքանշաններ, լուսանկարներ, տպագրված աշխատություններ, բժշկական գործիքներ, ժողովրդական բժշկության մեջ օգտագործվող նյութեր և իրեր, ինչպես նաև քանդակներ, դիմանկարներ, հուշանվերներ:
Ձևավորված ավանդույթի համաձայն՝ այցը սկսվեց հանուն հայրենիքի զոհված հերացիականների հիշատակը հավերժացնող հուշատախտակի առջև խոնարհումով և ծաղիկներ դնելով:
Այնուհետև Ռազմական սրահում, որի բացման, կահավորման և կազմակերպման ողջ գործընթացն իրականացվել է Ռազմաբժշկական ֆակուլտետի ջանքերով, ուսանողները ծանոթացան ինչպես Մեծ հայրենական, Արցախյան առաջին, այնպես էլ Քառօրյա, 44-օրյա պատերազմներին վերաբերող ցուցանմուշներին։
Ռազմաբժշկական կրթագիտական կենտրոնի հրավիրված մասնագետ Օֆելյա Գրիգորյանը իր պատմություններով, դիպուկ մեջբերումներով ներկաներին ծանոթացնում Էր թանգարանի՝ ազատամարտիկներին նվիրված սրահի նշանակությանն ու իմաստին՝ կարևորելով Արցախյան երեք պատերազմների ընթացքում սպիտակ բանակի ունեցած մեծ ներդրումը։ Օֆելյա Գրիգորյանի հավաստմամբ՝ այս այցերը միայն բժշկության մասին չեն, այլ անհատների, պատմությունների, ճակատագրերի, սխրանքների, որոնցից նա բազմաթիվ դրվագներ էր հիշատակում։
Շրջայցի վերջում ԵՀԲ քոլեջի «Նախնական զինվորական պատրաստություն» առարկայի դասախոս Ա.Կարապետյանը գրառում կատարեց թանգարանի տպավորությունների գրքում՝ ամփոփելով ներկաների ապրումներն ու զգացողությունները:
