2026թ․ մարտի 19-ին Երևանի հենակետային պետական բժշկական քոլեջը մասնագիտական կողմնորոշման շրջանակներում հյուրընկալեց Երևանի Հրանտ Դինքի անվան թիվ 44 հիմնական դպրոցի աշակերտներին։ Շրջայցին մասնակցում էին նաև դպրոցի փոխտնօրենը, մասնագիտական կողմնորոշման դասընթացավար Ք. Բաղդասարյանը, «Կենսաբանություն» և «Քիմիա» առարկաների ուսուցչուհի Մ. Արևյանը։
Այցի հիմնական նպատակն էր աշակերտներին մոտիկից ծանոթացնել քոլեջի պատմությանը և գործունեությանը, ներկայացնել մասնագիտական բաժիններն՝ ըստ առաջարկվող մասնագիտությունների, ընդունելության կարգը, զարգացման հեռանկարները և կարիերայի ուղու արդյունավետ պլանավորման հնարավորությունները։ Միաժամանակ ընդգծվում էր մասնագիտական առաջխաղացման ուղիների ընտրության կարևորությունն՝ ապահովելով աշակերտներին համապատասխան խորհրդատվությամբ և անհրաժեշտ աջակցությամբ։
Շրջայցի ընթացքում աշակերտները հնարավորություն ունեցան շրջել քոլեջի ուսումնական լաբորատորիաներով և ծանոթանալ մասնագիտական բաժինների առօրյա գործունեությանը։ Աշակերտներին ներկայացվեցին տարբեր մասնագիտությունների առանձնահատկությունները, դրանց համար անհրաժեշտ հմտություններն ու կարողությունները, ինչպես նաև ապագա գործունեության լայն հնարավորությունները և դրանց ուղեկցող պատասխանատվությունը։
Աշակերտները նաև ակտիվորեն ներգրավվեցին քննարկումներում՝ ուղղելով իրենց հետաքրքրող հարցերը և ստանալով մասնագիտական հիմնավորված պատասխաններ ու օգտակար խորհուրդներ։
Այս այցը կարևոր դեր ունեցավ աշակերտների մասնագիտական կողմնորոշման գործընթացում։ Նման նախաձեռնությունները մեծապես նպաստում են ապագա մասնագիտության գիտակցված ընտրությանը՝ օգնելով երիտասարդներին կառուցել հստակ և նպատակային ապագա։
