2024 թվականի մայիս ամսին Երևանի հենակետային բժշկական քոլեջի «Դեղագործություն» բաժնի 2-րդ կուրսի ուսանողուհի Կարինե Դումանյանը հաղթող ճանաչվեց ԵՊԲՀ քոլեջի կողմից իրականացվող “Lider-Z-Med” ծրագրի մրցույթում։
Ծրագիրը ստեղծվել է Երևանի պետական բժշկական համալսարանի քոլեջի ուսխորհրդի ղեկավար Լաուրա Զարգարյանի կողմից և համակարգվել ՈւԽ-ի անդամ Գագիկ Սարգսյանի կողմից։ Այն գործում է շուրջ 2 տարի, որի ընթացքում հավաստագրվել են 357 ուսանողներ։
Այս անգամ ծրագրի մասնակիցներն էին նաև Երևանի հենակետային բժշկական քոլեջի «Դեղագործություն» բաժնի ուսանողներ Կարինեն, Նելլին, Մարիամը, Արևիկը, Մերին, իսկ ԵՊԲՀ քոլեջից ծրագրին մասնակցում էին ուսանողներ Ֆրունզեն, Մարիամը և Վահեն։
Ծրագիրը բաղկացած էր 4 փուլից, իսկ մասնակիցներն 8-ն էին։ Յուրաքանչյուր փուլի ավարտին պետք է դուրս մնար 2 մասնակից, իսկ արդյունքում պետք է հաղթող ճանաչվեր մեկը։
Առաջինը «կանաչ արկղերի» փուլն էր։ Մասնակիցներն ընտրում էին արկղերից մեկը, որում կար անատոմիա առարկայից մեկ թեմայի վերաբերյալ թերթիկ։ Թեմայի յուրացման համար հատկացվել էր 2 շաբաթ։ Այդ ընթացքում կազմակերպչական աշխատանքներով զբաղվող թիմի՝ «STAFF»-ի անդամների կողմից մասնակից ուսանողների համար անցկացվել էին դասախոսություններ, որոնց ժամանակ մասնակիցները հավաքել էին որոշակի միավորներ։
Ծրագրի 2-րդ փուլի ընթացքում “STAFF”-ի անդամներն անդրադարձան հոգեբանության նրբություններին, «պլացեբո» և «նոցեբո» հասկացություններին։ Այնուհետև մասնակիցներից ձևավորվեց երկու թիմ, որոնցից մեկի անդամները ԵՀԲ քոլեջի ուսանողներն էին։ Թիմերի ձևավորումից հետո “STAFF”-ի կողմից առաջադրված «Անմահության լավ և վատ կողմերը» թեմայով անցկացվեց բանավեճ։ Մեր քոլեջի ուսանողների թիմը պաշտպանում էր «անմահությունը»։ Հետաքրքիր բանավեճի արդյունքում մեր թիմը վաստակեց 2 միավոր և հաղթող ճանաչվեց։
3-րդ փուլը իր բնույթով գործնական էր, որի ընթացքում մասնակիցները հնարավորություն ունեին վաստակել մինչև 5 միավոր։ Փուլն սկսվեց ներարկումների և լիգատուրաների տեսակների վերաբերյալ դասախոսությամբ։ Լեկցիայի ավարտից հետո ցուցադրվեցին ամպուլայի ճիշտ բացման, կիրառման և ներարկման բոլոր նրբություները։ Մասնակիցները փորձեցին նույնությամբ կրկնել ցուցադրված գործողությունները։ Փուլի ավարտին յուրաքանչյուր մասնակցի տրվեց ջրով լի ռեզինե ձեռնոցներ և 2 րոպե ժամանակ՝ լիգատուրայի որևէ տեսակ կիրառելու համար։ Երբ հատկացված ժամանակը սպառվեց, “STAFF”-ի անդամները ստուգեցին կատարած աշխատանքը և հայտնեցին յուրաքանչյուրի միավորները։ Արդյունքում ԵՀԲՔ-ի «Դեղագործություն» բաժնի 2-րդ կուրսի ուսանողուհի Կարինե Դումանյանը վաստակեց 3 միավոր։
3-րդ փուլի ամփոփման արդյունքում Կարինե Դումանյանը վաստակեց ևս 3 միավոր։
Ծրագրի վերջին՝ 4-րդ փուլը, ինտելեկտուալ խաղի փուլն էր, որը կոչվում էր «8-ից 1-ը գիտելիքների խաչմերուկում»։ Ավարտական փուլին հասած 2 մասնակիցներին տրվեցին 5-ական հարցեր ինչպես նախապես ընտրված անատոմիա, այնպես էլ քիմիա, կենսաբանություն, ֆիզիկա, հայոց լեզու և գրականություն առարկաներից։ Այս փուլի արդյունքում ևս Կարինե Դումանյանը հաղթող ճանաչվեց, և նրան հնարավորություն ընձեռվեց նախորդ ծրագրերի բոլոր 21 հաղթողների հետ միասին «Միքայելյան» համալսարանական հիվանդանոցում մասնակցել մեկշաբաթյա պրակտիկայի։
Մայիսի 27, 2024թ.
